मानव किंञ उपन जपन सोमय रे देशाउलि, पाऊंइ, जैरा, गोंवा बोंगा को सिंबोंगाः आंदे ओंडों कामि क्रुइड केडते लुकु आर लुकुमि किंञ उपन जपन जना । निंकिन हरा मरं तन रे गे न सबेन बोंगा को इसु गिः को तेरेः गेंजे केना । एना मेनते चेतन नोतोर सनाम बोंगा को आकिंञ ताःते सेवा सड़ा को नाम जना । बोंगा कोरे देशाउलि मुड़ बोंगा तना । एनामेन्ते आकिञ आकोवा सेबा सड़ा टायड दो देशाउलि किञ उमि केडा । मेन्दो नेन देशाउलि अडि- बडि ओंडो ने देशाउलि रे ऐषु निरल कटाब – तुरुब ते अंग चपंग तुर चपांग किंञ सेबा सडा केड कोवा ऐना मेन्ते सनाम बोंगा को आकिंञा सुकु- दुकु रेको देगा केड किञा ।नाः जाकेड सबेन हातु रे देशाउलि हातु कुटि रेगे को रिका केडा ।

देशाउलि आदिवासी कोवा धोरमो चि बोंगा टायड तना । नेन देशाउलि रे पुन बोंगा कोवा टाईन टायड दो । हातु रेन दियुरी पोरोब पोनाई रे कटाब तुरुब तेः सेबा सड़ा कोवा ।दियुरिः बोंगा तन रे नेनाः कजि मिडेया चि सुकु सुमुकि होबान का, दुकु कोयते दुः लेम , रोग जुगिया हातु रे आलो होबान का, उरिः केड़ा सिम सुकुरि को बुगि लेका को ताईयो का, कोड़े टुन्टा, आम्बारी कोवायते दुः लेज्म ओन्डो एटाः एटाः ( ऐमान – ऐमान ) हातु रे रोग जुगिया होबा जान रे दियुरि देशाउलि रे कटाब तुरुब दःअ दुलिया चिल्का मारिः , हैजा , उरिः केड़ा कोवा रोगो रेयो दः दुलिया  अर बुगि जान तायोम हातु रेया देंगा ते दियुरि दाऐः बोंगाया । साबेन हातु रे नेन चोलोन मेनाः ।

हातु साई देशाउलि बड़िः जन रे दियुरि हातु साईया देंगा ते देशाउलि जातिया एन्ड एनं देशाउलि रे बोंगा दाइयोवा । बड़िः दो नेल्का देशाउलि रे इःइः , डुकि, गोनोएः रे सेन लेन हो , का ओड़ा कान्ते बोलो, चान्डु नेल तन कुई होन बोलो , बेगार आनन्द ते देशाउलि रेयाः दारु माः केरे तोका उला , ईःई , को होबा इरिया । आटकर केते ओड़ाः रेने को दियुरि देशाउलि रे दः को दुल इरिया होड़ोः बुगिनो गिया । ठीक एन लेका 1965-66 रेया काजि तना चि बुरु बोड़ता देशाउलि आयरते लम्पा नुमु रे टाई केना जेटे सिंगि रेया कजि तना लम्पा हेस्साः रेन कुई ओमोल कान्ते बुरु षूडता देशाउलिः रेयाः दःए नु केडा । देशाउलि सारि सोतोये गिः ताईकेना। लिलि को एन कुई होन तुतु को आचु जाना । तुइ तुइ ते ओड़ाअ को बेटा किया अर अयः चनब – चनब गे गई साराह को जाकेड हर लिया । हुड़िंग उड़ि रेगे आयाः दनं होबा जना। एन लेका हातु- हातु रे देशाउलि बड़िः  के होड़ोः कोरे होबा कना। नाः समते एन बंश रेन को एन देशाउलि रे काको बोलो दाईया।

मेन्दो तिसिंग देशाउलि माइन ममरं रिका तन तेगे बोंगा बुरु को आबु वाः सुकु दुःकु रे काको देंगा बु तना ।  होबा दाइयो दियुरि काटाब तुरूबते बोंगा बुरु को काऐ सेबा सड़ा जड़ कोवा। उड़िः ओडोंरे पोरोब पोनाई का होबान तना ओकोय दो सेतः, ओकोय तिकिन दो, ओकोय हासुर सिंगिःऐ बोंगा ताना। नेया बोंगा दोःए बोंगाओ तना चि सेवाम तना, सड़ाम तना , तुर चंपं अं चपं । हातु रेया देंगा देपेंगा रापुडो तना। हासु दुकु रोग जुगियो बड़ाओ तेरसाः तना । दुःकुदुः  दो मिड मडत मन ते मनातिंञ रे होबाना ।  तिसिंग आदिवासी रे लेकान तन को तः रे गोहारियोः तना चि लुतुरोः काबु, मेन्डोः काबु , देशाउलि माइन ममरं बु हेता बागेये तना। देशाउलि आबुवाः टुकुः दुः होबान तना। तिसिञ आबुवा देशाउलि टायड- टायड रेको मुचाडे तना , ओकोन रे ओड़ाः , डैम , लाइन सोड़पो- होराः कोकोः बाई तना। एना मेन्ते नेन देशाउलि टायड राकाए तेयाः बुदिजोः का।

Source: ( किताब – ओतोरोड. , लेखक – बाल गोविन्द लमाय )

Donate: https://imjo.in/butf7S

Categories: Culture

HO Dictionary

Dedicated to the HO Community

Leave a Reply

Your email address will not be published. Required fields are marked *