जोज्जो दो सबेन कोबू नेलाडा । जोज्जो दो मियड् दरुःउ गिन्हीस तना । नेन रेयःअ जोह, पत्हा सनमगे जोज्जो गेको मेतःअ । जोज्जो पुरःअ तेदो हतु रेगे तइना । चेनःअ चि नेना दो रोवाय तेयःअ तना । मेन्दो , बुरु कोरे योगे नमोःअ अः। हतु रेयोह गे पुरःअ उतर दो लोलो टैड् रे होबाना । अबुवःअ मुलुक् भारत रेदो कन्दुवा पाह रे पुरःअ नमोःअ अः। एन टैड् लोलो पुरःअ ओन्डोःअ एनाते एन ताःअ रेन होड़ो को पुरःअ को जोमा । गून रेदो जोज्जो लोलोवा।

जोज्जो तिर्सि बिसिःइ  गे पत्हावअः। बाह दो बुर्दुड़िःइ मेन्दो पन्डु-ससं पल्पोयोङ् गे बाहा ना । जोज्जो बर दोउ बाहवो अः। अयरःअ बाह दो गसारोःअ अः। तयोमःअ बाह येते जोह ना। जोह दो उटि -उटि चि डेके मेके बइना । चेतन रे चोकःअ अदो बितर दो जिलु सेल्ल जं तइना । एन लेका गे चोकःअ  दो पल्पोयोङ गदेड् चि हल्मड् मेन्दो , जिलु गे तइना ।

जोज्जो पत्हा, बाह अन्डोःअ जोह सबेनःअ जोमेया। बाह दो हेबन -मोरोःए या। एन रे मेतोल्ल दो पुरःअ अदो मोरोःए तेदो कोम गे मेनेःअ । पत्हा बलेःए रेदो मोरोःए , नोगोडा। पकोड़ो यन रेदो मोरोःए , लाः ना। हाम सकम दो मोरोःए – मेतोल्ल अः। जोहः बलेःए रेदो मेतोल्ल-मोरोःए या। चिलिका गे पकोड़ो इडेना, मोरोःए लाअः इडेना। बदा तेदो नोगोड् – मोरोःए ना। मता बहारा कन रेदो हेम चि हेड़ेम सिबिला । मता चबा यन रेदो मोरोःए तेयःअ लन्हाःअ ना । तरा मरा दो मेतेर्रअ अदो अदोङ् दो म्हेर हो गे मेनःअ । ओकोन-ओकोन जोज्जो दो नुःउ – नुःउ तना। ओकोना दो कःए- कःए तना ओन्डोअः चिमिन दो रिःइ- रिःइ तन्हो गे मेनःअ।

जोज्जो रे लोलो राहगो मेनःअ। एना मेन्ते , जोम लाअः क्हे रेदो जाअड़ःअ चि लइ इ दू दुला। नेन रे तेजब रेयःअ ओङस मेनःअ। जोम क्हे रे लेःए पर्ची गे अदाव अः। मेन्दो , पुरःअ यन रेदो दटा मा कन्डो उतारेना। हसु सिटाह कन आ चि अमोल नजोम लगिड् दो रनु बइ दइयोःअ अः ।

जं दो बितर जति दो पुन्डिया । चेतन रे हेन्दे- अरःअ मोटा चि इबिल चोकःअ मेनःअ । जोमे रे दो मेतोल्ल गेया । एन चोकःअ लतर जं चेतन रे एतं अरःअ गबे मेनःअ । जोमे रेदो नेना हेबेन- हेड़ेम गेया । टाँण चि जाँया कन रे जं जोमें रेदो बूगिना । जं दो रिड् क्हेड् दःअ रे बोड़कव ल्हेड् मोह करे गवरे ओजोःअ ता रे बूगिना । बिषिया कन रे दो जं इर्रअ ल्हेड् वेःए दःअ लोओःअ जुवःअ ता रे बिषिःइ को चबा या। पंगुरा हसु चि रोगो रे दो बिजिलि लेका सयका ता। मोचोड़वा कन रे दो पत्हा तेर ल्हेड् उयुम तपःअ ता रे हसु होका ना।

दरु दो षुमं सान पइटि रे हुजुःउअः । दरु रेयोगे चेतन मोटा हर्तःअ मेनःअ। एन लतर रे एतं ऊँर ओन्डोःअ बितर रे दो केडेःए जं दरु मेनःअ। तगोःए लेक्हा रेदो जेरेम् जुवःअ जटं नोःअ सबःअ गेया। दरु दो मेहेड् तमल्गड् गेया। केड़ेःए रे दो तबुःए गेया।

जेटे दिन दो जिलु ते गूड़ रे लेपा क्हेड् नूई रे होम्हो रेयाह गे तइना । सेन होरा रे पेयाजि लोःअ गोच्हा करे टाँण चि जाँया का सा सबा।

किताब – षड़ा षुड़ा सङेन्

Donate: https://imjo.in/butf7S

Categories: Story

HO Dictionary

Dedicated to the HO Community

Leave a Reply

Your email address will not be published. Required fields are marked *