षिरजोन ओड़ोङ सिंहबोंगाह चुबी मेनेम ओत रे बुरु-दिरी दारु को बाइ केएते साज सिंगेर जोतोन लगिड मनोवा कोए पुंजी लेड कोवा ओन्डोः सिंहबोगाह एनेतोगे तना चि मनोवा पुंजी पोवा सिरजोन दो लेगेः बेगेः हरा दारुए कन सेपेड – हपानुम किञ कुलगिए जुड़ि – जुपुड़ि तायोम एनङगे एयोबेना । इमितं दोस्तुर आन्डोः मोणेको ताला रे आणांदी – कोणांदि होबाना । नेन मोणे को तला साकी नेल उम्बुल रे होबान आणांदि  लोःअ ओ गे बोंगा – बुरु, सेबा – षड़ा रे नामा कुलगिया किञःए एनेतो ऊंकुड़ुना ओन्डोः बला-सका दानारोम जोङ ताड़ रेको ता´ड़ेया , चिलिका

    रुङ जुम्बःह कदल जुम्बःह

    देवताओ चि बोंगा बेगाई ।

चिगा , नेन ताड़ बेन आयुम मुन्डि केड चि चिनः तोरं इंगुले तन । ओरतो पोरताड़ लेए रेमा का लेका पंजाओ मेनदो नेन रुङ चिनः मिसाबु अटकार ले´या ।

मनोवा षिरजोन ऊंकुड़ु तन इमितं रेयः कजि सिङबोंगा लुकु-लुकुमि किञःए उपन – जपन लेड किञःए इमितं ओत् रे बिर – बुरु , दिरि -दारु सुमेड बाईकेन । बापुइ उपेन जपन यन तायोम गियुः चेनाः मेनतेया गे अटकार बनोः मेनदो अटाकर इरिकिञ लगिड ओड़ो मनोवा षिरजोन पोवा – पुंजी होबान चा मेन्ते सिंहबोगा´हः चुबि ते देशाउलि , नागे एरा , बिंदि एरा , बागेया कोःए आचुलेडा ओड़ो कुलय सायका देशाउलि सेटेर लेन तायोम लुकु हड़म – लुकु बुड़ि किञःए लोओबो लेड किञःए । मानाअ कन जिनिस रेकिञ लोओबो लेना मेन्दो बोंगा बुरु को ऐड़ेंगार यन ओड़ोः कोचा कोंदोल को काकिड़ि लेड किञःए । इमिता देशाउलि देंगा केड किञ ते जापिड कुमु ताला बोंगा बुरु को सेबा – षड़ाए एतो लेड किञःए । एन इमितं अकिञ टोटा´कना लिञ मेन्तेकिञ अटाकर केडा ओड़ोः गियुः दालोब तोवान नं बिर- बुरू रेकिञ बोरसा यन चि होमोह दालोबेन तेयाह लगिड रुङ पताह रेकिञ बोरसा´हडा । चिलिका ताड़ रे रुङ जुम्बे कदाल जुम्बे मेन्ते कजियोः तना एनकागे रुङ दो नाइयनाएते जालडुबेना नेया जंङ अयते ओमोनोवा ।

रुङ ओमोन यन तायोम ति गान्डा लेका मुलि सेंगेर गे चेतान राकाबेना । एनायते जान दारु जेतान दारु रेगे आसरा ताइना, आःए जापाः रे मेनाः जान दारु रेगे जापानेना ओड़ोः सुवए – सुवए ते पाटु बियुरेना । एन तायोम चिमिन चेतान दारु सालांगिना इमिन गे चेतान नइ इडेना । नइ इड नइ इड ते गोटा दारु गोहडो रेनाओवा । नेया रेयाह सकम बर चटाः रे टइना । सकम पतावो तन इमितं डान्डिउ बइ ऊंकुड़ुना । तयोम तोड़ा रे जोवार तड जोड़ बले लेमेर लेटों तन पताह बाइयोः । एन तयोम पकोड़ो यन चि तरसा लेना । नेन पताह बोंगा बुरु तन इमितं एसुगे दोरकारा । नेया सकम पोरोब पोनाई रेयाः बोंगा बुरु रेगे पाइटि को आगुइया । ओवः हाम हो बुड़ि ऐराकोवा सेवा- षड़ा रे एसु पुरःअ पइटिः हुजुःए । आदिङ रे सेवा तन इमितं डन्डिउ लोःअते सरताल केड मांडी ऊतु को-को बोंगा बुरु चि पुंजी तेयः । बोंगा मांडि दान्डि आतोमा कनते कालगिया कन् रुङ सकम रेगे को एमेया ओड़ोः उतु मान्डि आतोमा कन रुङ सकम रेगे को एमेया ओड़ोः आदिङ रे को जोम सुटम तेया ।

दान्डि मेनाह तेयाह रुङ सकम मिड पा´गेको कोचोम्बा केएड इलि को चोड़ोरेया । बुरु जापाः रेन्को नेन रुङ सकम हेए केएड हाट रेको इडेया,  बितिको अरजाओ तेया, ओकोय कलगि, तारा चिटिकी ओड़ोः तरा दो पुःऊ चुकुदी बाइ केयाएतेको अकारिङेया । आणांदि बाला कोरे रुङ सकम रेयाह पुःउ रेकोजोम नु तेया । नमा कुलगिया किञ तन सेपेड हपानुम किञ आंदियो तन इमितं कुइ होन रुङ सकम रेको तापेः इरिई ओड़ो कोवा होन सरजोम सकम रेको बोंगा बुरुया ओन्डोः नमा कुलगिया किञ ति´रे सपाब इरि के´ड किञ ते रुङ बायार तेको तोल के´ए किञ तेको बड इरि किञए । रुङ बायार एसु बुगिलेका बयारोवा । जोम सराः  को सुनुम लेन कुलिः सिकुवर, उरिः मेरोम तोल हाड़ामड एमन एमानः कोको बाइये । सान सकम तोल चि बकइ चुरुई को बाइ तोल तेयाह लगिड एसु हिडींएना । बकाई माते सम मांजा जाकेड को चटाः लेएड को तोल्ल तेयाह । नेल तन रे चिलिका सकम जोवार तन लेका नेलोवा एनकागे सेवा षड़ा रेः जोवार दाड़ु इरिया । सकम ओड़ोः नाई माते एसु पुरः पाइटि रे हुजुः गेया मेन्दो नेया रेयाः जो´गे हो हुदा रेयः मरं रेनाह पोरोब “मगे पोरोब” रे बेगार रुङ जो “लमाः” ते सेवा – षड़ा का होबाना ओड़ोः “लमाः” जं का बोंगा ताला केए रे दोष्तुर का पुरेना । नेन रुङ रेयाह जो´गे लमाः को मेताः । रुङ रेयाह ब्ह पुन्डि गे बा´ओवा । ओड़ोः जो दो कापी लेका अटाकरोः वा ।

बुरु बागे केड हातु कोदो रुङ जो लमः मेन्ते कको नम जोमते सिंह आह् जो को बोंगा तलाया । ओकोन मुसिञ दिउरी मरं पोरोबेः बोंगाया एन मुसिञ नेन लमाः जोःए बोंगा तालाया एनायते गपातेर मुसिङ जातारा बोंगा मुसिञ जातारा दिउरि बोंगा तालाया । मेयांतेर हर मगेया मुसिञ महाबुरु पा रे बोंगा साकी लोःओ होरा सिमेन हातु चिरमड रे बागेया सेबा मुसिङ को सकीई लोःओ हातु साइ रेन सबेन पोरजा पईटि को लमाः को पोटेःए केएड जं को बोंगाया ओन्डोः को जोमेया । लमाः सेंगेल रे ऊरुब लोलो केयाएते उरगुम –  उरगुम गे तेगा पोटोएते होबाना । वोला रे ताइन जं ओन्डोङ केएतेको जोमेया । जं दो मेएर – हेबेन , मेएर – हेबेन गे जोमोःवा । जोम तन रे एसु बुगिन अदावोःआ । मेनेम चि बोंगा बुरु को पोरोब पोनई रे सेवा षड़ा के कोते जोरोङ जीनीड बोचोर मुन्डि को होरो तला गोंगोर ताला लेका अटाकरोःवा । हेरोः पोरोब रे रुङ सकम रेगे हेरोः लड् को तिकिया । ओकोना ओदोवा चाऊलि लुपुःतड् तेयाह हेरोः रेको बोंगाया  । लमः जं जोम केए रे लाइ हासु को का ना´मा । नेलेकाते रुङ मेनेम बोंगा बुरु सेवा –  षड़ा लोओः ते चास बास बिति अरजाओ ओन्डोः रेएड  रानु रेयोह का चोटेः मेनाह ।

( रामसिंह चातर )

Categories: Uncategorized

HO Dictionary

Dedicated to the HO Community

Leave a Reply

Your email address will not be published. Required fields are marked *